要做專業人士要考專業資格，想做分析員最好有CFA特許資格認證，絲絲知呢個試唔易考，今年合格率只有43%。
據講CFA課程自一九六三年推出以來，CFA協會已舉行逾100萬場考試，原來考生為咗考試，平均花300多小時溫習及預備每個級別嘅考試。CFA考生通常需要用4年時間通過3個考試，一級考試每年舉行兩次，二級及三級考試每年舉行一次。
戰線拉得咁長，唔怪得合格率咁低，但喺另一個角度睇，就顯得攞到資格係身份嘅象徵，真係跳槽都易啲。
講番今年嘅考試，喺全球11.5萬名考生中，共有43%通過考試，其中4.8萬人參加第一級考試，合格率有39%；4.4萬人參加第二級考試，全球合格率有43%；2.2萬人參加第三級考試，合格率有51%。第三級考試嘅合格率最高，其實好易理解，既然咁辛苦過到頭兩關，講得俗啲，真係「死都死埋佢啦」。
余絲韻