絲絲講場：林一鳴升職冇畏高
中信証券國際董事林一鳴（Eddie）係金融界嘅馬拉松好手，佢近期完成咗奔闖阿爾卑斯山嘅創舉，最終用咗逾6小時14分，跑畢42公里有多嘅馬拉松比賽。今次馬拉松有幾辛苦？就連平日訓練有素嘅Eddie都形容為「超級辛苦、真恐怖、好凍呀」！
咁又係嘅，由山腳一口氣跑到海拔近3,000米高嘅雪山，正如佢所講，「有命返嚟就算啦」。雖然係咁，Eddie參加馬拉松比賽嘅興趣未有絲毫減退，未來仲計劃北上，到西藏、北京萬里長城等地繼續跑。更意想唔到嘅係，佢兩個8歲及3歲嘅囝囝都有參加早一日舉行嘅迷你馬拉松，用幾分鐘分別跑畢1,400米及500米。
職務多咗夜晚無休
除咗馬拉松愈跑愈高（海拔）外，Eddie喺職場上亦步步高升，職位由原來嘅中信証券國際董事（零售證券業務發展），升任為中信証券國際董事、證券零售業務及證券業務發展主管。新職位嘅職務及責任都多咗，例如要多啲落分行見前線員工，工作時間亦長咗，好似絲絲尋晚七點幾打電話畀佢嗰陣，佢話仲要趕返公司做嘢，可見佢做事與跑馬拉松一樣，都係竭盡所能，做到最好。
余絲韻