市場熱線：兗煤蓄勢補裂口

好多專家都分析話份禮唔算厚，港股ETF雖有「小直通車」之稱，但要睇吓同胞股民嘅興趣有幾大，好多同胞一早有門路買港股，ETF屬於被動、投資年期長、上落唔大，古勝覺得冇乜吸引力。至於小QFII就掉轉係港水北上，200億人仔額度同以前所講嘅一樣，古勝仲記得當初構思係一定要幫襯中資證券行，而初期只係准買債券。所以尋日逢親證券股都升，明顯係博懵性質。

北上買債夠高息

其實如果准香港人買A股肯定有需求，古勝身邊有唔少股友都感興趣，尤其係見內銀股、保險股同個別龍頭股嘅H股仲貴過A股，當然會選擇買平唔買貴，但阿爺一向好重視金融安全，所以想買A股可能有排等。不過，有得買債券都係好消息，啱啱財政部發債得1.6厘息，如果可以北上直接買債肯定高息好多，但得200億人仔實唔夠分。

外圍經過早排多多事幹之後，呢排唔使再幾百點大上大落，彈完後再慢慢陰乾。港股仍處反彈市，弱勢股例如航運、兩鐵（00390及01186）等反彈。放榜期買中績優股亦不宜久留，勝獅（00716）升1日之後已回軟4.3%，金蝶國際（00268）賺多43%以為好堅，但有幾千萬係重估物業收益，股價大插17%，卡姆丹克（00712）中午派完成績表後即插11%，炒業績其實係高風險。不過，金飾鐘錶股長炒長有，東表（00398）升得最勁，在下一向鍾意金股多啲，呢排瑞郎係咁升值，都唔知對鐘錶有冇影響。

尋日升得最勁嘅大隻佬係中煤能源（01898），大升近7%，花旗同「高佬盛」齊出報告，花旗目標價為15.4元，高佬盛目標價得7.4元，可謂差天共地。但以中煤尋日股價嚟睇，高佬盛似乎失威啲噃，不過高佬盛唔係睇淡煤炭股，而係鍾意兗州煤業（01171）多啲，認為兗煤一一至一三年嘅銷量同盈利增長都可以維持強勁。

煤價長遠續看漲

煤炭股今年一直係威係勢，但八月上半月統統由高位大跌兩成，除咗跟住大市同油價下跌之外，祖國煤價回落亦係原因之一，但煤價累跌只係2%左右，升咗咁多嘔番少少係好正常，原因係電廠庫存充足同埋今年雨水多（水力發電替代火電），但煤價長遠上升勢頭仍然不變。

兗煤賣現貨煤為主，對煤價最敏感，股價亦跌得最多，低位22.8元計較高位唔見咗10蚊，如果煤價真係回升嘅話，佢嘅反彈速度亦肯定最快。況且公司禮拜五派成績表，有中煤珠玉在前，應該唔會令大家失望，望佢補番個下跌裂口28.75元。

古勝