Google吞併摩托羅拉手機業務嘅消息，刺激研祥智能（02308）股價尋日開盤竟然大幅爆升5倍，原因咪又係兵荒馬亂，有人「誤中副車」囉！
做資訊科技嘅研祥智能平日好冷門，但尋日一開市就報3.46元，較周一收市價0.7元竟然爆升2.76元，升幅近5倍，睇到絲絲眼都凸，有人打電話畀絲絲問有冇收到風，絲絲即刻睇吓20大升幅，發現富士康（02038）都好標青，開市亦彈升超過一成，當睇到佢個Code（股份編號）及價位，相信大家都當堂明白晒。
Google呢單世紀大收購帶挈埋富士康，開市前富士康個價已經搶到亂晒龍，結果以3.6元高開5%，高位更曾見過4.02元，最多升17.2%，好明顯係有人將「2038」入錯咗為「2308」。
之後早上10點半果然見到聯交所登咗呢單烏龍盤申報，涉及12,000股，每股正係3.46元，交易額4.152萬元，好彩中間個差價都只係約3.3萬元，就算交易取消唔到，或者個粗心大意嘅經紀要硬食，都唔算真係痛入肉。
余絲韻