鄭海泉（Vincent）由滙控（00005）執行董事之位退下火線後，大家都估佢係退而不休，絲絲早排亦見到佢精神好好。各大上市公司一早已經對呢位不可多得嘅銀行家虎視眈眈，希望將佢網羅入局嘅公司為數不少，結果Vincent與中電（00002）「過到電」，尋日中電正式宣布佢入局做獨立非執董。
Vincent一直都有唔少其他職務在身，包括係港鐵（00066）、匯賢（87001）嘅獨立非執董以及太古地產嘅非執董，今次佢與前廉政專員羅范椒芬齊齊入中電董事局，每人每年嘅董事袍金係四十萬元。今次委任唔算意外，因為Vincent做咗咁多年銀行，退下火線之後都講過，希望退休後專注公職，揀公用事業龍頭之一嘅中電都合乎情理。
剛啱退休時，Vincent話食歡送飯局都忙到不亦樂乎，仲話食完之後，過番咁上下時間先諗去乜嘢公司做嘢，睇嚟佢已經將歡送飯局消化得七七八八，要羅致佢入局嘅大公司要快手喇。
余絲韻