市場熱線：中海化唔怕翻兜

芬佬擔心經濟衰退

美銀美林八月為環球基金經理做咗次調查，四個重點係：基金經理對經濟衰退憂慮升溫、基金現金水平普遍上升、對上市公司盈利預測樂觀程度、以及在股市的資產配置下跌，意味股市短線提供一個人人自危的買入機會。數字上，擔心經濟衰退的芬佬比例，由一個月前的13%翻一番去到29%，基金淨現金水平由一個月前的4.1%升至5.2%，是三月九日以來最高，認為如果標普五百指數跌穿1,100點（周一晚在1,204點），會觸發聯儲局推出QE3的，比例由28%升至60%。

谷歌買摩記，擺明向「哎瘋」宣戰，古勝覺得絕對係好事，連祖國3大電訊商都要向蘋果電腦搖尾乞憐，好似邊個有得賣哎瘋就得天下，對消費者亦絕非好消息。不過，呢單消息的確影響重大，泡菜國魚缸尋日復市勁升4.8%，都係多得三星電子帶動。其實早有分析話谷歌今次收購摩記之後，同三星及HTC反而由合作變成競爭對手，手機股未必有着數。

至於香港上市公司有冇着數要放長雙眼，但尋日大部分同電話、電訊有關嘅股都上升，好多擺明係渾水摸魚，較特別係數碼通（00315）創新高後倒跌，主力做2G手機嘅TCL通訊（02618）更大跌近7%。「受惠股」則大把，富士康（02038）最快跑出，客戶包括蘋果電腦同摩記嘅瑞聲（02018）亦升3.6%，博左右逢源乎？

內房股尋日亦算有表現，除咗龍頭股恒大（03333）發盈喜帶起之外，有傳二三線城市限購令瀕難產，前排亦傳保障房要降低目標。古勝話歐美債務危機可能令內房股有轉機，純粹係從資金流向推測，出口已經有好大危機，惟有搏命谷內需。

東岳（00189）派完成績表後先升後插，做醫療設備嘅威高（01066）亦一樣趁好消息出貨，勁賺多9倍嘅勝獅（00716）其實同預期差唔多，但股價卻勁升11.4%喎。炒業績的確好考工夫，先要睇業績前係唔係已反映利好或不利因素，好似中國無線（02369）冇乜人有期望，所以賺少一半反而當好消息。派完成績表後最主要睇估值同前景，東岳大插插嘅原因，相信同公司承認製冷劑產品價格會「適度」回調好有關係，即係上半年嘅特高毛利率應不會維持。

下半年業績料改善

所謂鐘擺效應，無論升跌都特別誇張，隻中化肥（00297）跌穿3蚊嘅雙底支持位之後，連兩蚊亦一度穿埋，話晒係祖國鉀肥一哥都咁悽慘，連累埋中海石化（03983）喺上周一亦曾急瀉兩成之後先回穩。肥田料行業今年上半年成績表唔係太睇好，但中海化今年仍有望取得增長，皆因公司今年甲醇產能大幅提升，所以股價亦遠遠跑贏同業中化肥同心連心（01866）。

中海化同心連心嘅業務都係做尿素同甲醇，後者中期成績表賺少五成，產品毛利率大跌，咁計法中海化亦唔慌好。不過，中海化係龍頭，有規模效應，兼有姐妺中海油（00883）提供廉價天然氣，所以未可睇死。況且心連心話尿素價格已升超過一成至每噸2,200蚊人仔，有信心下半年業績會有好大改善。

中海化今年以來股價算幾平穩，農產品價格上升刺激肥田料需求，隻股仍可以炒上落，但目標價不能太貪。

古勝