金融圈職場變化，完全睇金融市場好與壞嘅走勢，最近絲絲聽老友講，話今次金融危機最終會發展為風暴抑或海嘯仲未知，公司請人都唔敢咁勇。不過，專營會計、金融及銀行、資訊科技界專才嘅招聘公司Robert Half就話，三成香港僱主會喺今年下半年增聘金融、會計或銀行業人手，咁即係話，僱主唔係睇得咁差。
Robert Half香港總裁安柏菲（Pallavi Anand）話，啲僱主話依家好難請到優秀嘅專才，究竟有幾難？90%嘅亞太區僱主話難，呢個比率喺香港及新加坡公司更分別高達93%及97%。
原來香港僱主覺得，金融及法規行業係最難尋求專才嘅範疇。香港公司嘅人事部經理正嘗試藉培訓及提高團隊嘅技術（佔48%），以及內部晉升（佔47%）應付人才短缺嘅困局，香港僱主增聘人手嘅主要原因，係配合業務擴充（佔56%）及減輕現有員工嘅工作量（佔53%）。
為咗網羅啱用嘅專才，有37%嘅香港公司會搵招聘公司幫手，亦有話會透過提高薪金、花紅等金錢獎勵佔（35%）以及員工推薦獎賞（佔30%）等方案應付人才短缺，從而吸引及挽留最優秀嘅專才；此外，研究亦發現大部分香港僱主（佔88%）均擔心喺明年會流失出色嘅金融專才到其他公司，呢個比率遠超於區內76%嘅平均數，所以話做老闆嘅，有好多嘢擔心架！
余絲韻