尋日再冇黑客入侵港交所「披露易」網站，由於立法會財經事務委員會有意追究，港交所已趕起報告，喺尋晚交畀證監會，稍後證監會再交到立法會，公眾最快可以喺本周稍後睇到，報告將交代事件發生經過、停牌考慮、補救措施、事故原因及保安設施等。
今次黑客干擾除採用分散式阻斷服務外，仲配合唔同攻擊策略，瞬間向網站發出大量不斷重複嘅網絡接連要求，令登入網站發生困難。
外間質疑網站保安系統，港交所就話一直有觀察網站使用量，亦定期進行壓測，並設有防火牆、過濾軟件等保安措施，亦不時諮詢顧問，更新保安及防禦措施。
近期受到黑客襲擊嘅港交所，喺明日（周三）將會有重要人物到訪交易大堂，港交所尋日就出咗通告畀經紀行，要求交易大堂嘅出市員喺明日要穿着整齊上班衣服，又要提早返工（上午9時半前要進入交易大堂），並執拾好儲物櫃確保冇危險品及貴重物品，交易所將向各出市員送贈兩張早餐現金券，答謝佢哋嘅合作。
唔講唔知，今次送早餐現金券係加碼，以往只送一張20蚊，今次送夠兩張。唔好睇40蚊好似好少咁，原來近年中環因為食肆競爭大，普通早餐反而比其他地方平，所以40蚊都好夠食喇。
余絲韻