辭官歸故里嘅古仔，大家應該聽得多，建行香港分行總經理毛裕民就話，希望日後可以返內地種豆，好想搵番細個時候飲嘅豆漿嗰種香味，但佢就講明要等到成功推進人民幣國際化先會「離場」。不過依家內地銀行求才若渴，點會畀毛總咁易退下火線吖！
毛總話自己一直都好懷念以前飲豆漿時，豆味香氣四溢嘅感覺，又話依家啲大豆質素唔同咗，佢希望等到人民幣國際化之後可以返鄉下耕田，過番一啲冇農藥，又冇化肥嘅田園生活。
佢仲好自豪咁講，話當年上山下鄉，只要畀佢幾十畝田，佢自己一個人已經可以打理得好好喎。
內地銀行業近年發展得咁快，人才需求好強烈，毛總就好謙虛咁話，當年係因為唔夠農地畀佢耕田，佢先會走去做銀行家，點知入咗建行之後就做到依家。原來佢當年讀大學時都係揀文學，點知偏偏又被分派咗去讀銀行。
建行董事長郭樹清一直都對於佢哋重視人才感到好自豪，而且公司管理層好少跳槽，要佢哋放一個不可多得嘅「賓卡」去耕田？睇嚟毛總都幾難如願喇。
余絲韻