受惠於自由行政策，香港旅遊及零售業變得好旺，酒店價值自然水漲船高，遠東酒店（00037）董事總經理邱達偉都話貴得滯，暫時唔諗住喺香港買酒店。同樣係邱氏家族旗下嘅麗悅酒店（02266）咁啱尋日公布喺倫敦買地建酒店，莫非兩家公司嘅管理層睇法一樣，都係嫌香港酒店貴？
邱達偉話，最近幾年內地遊客多咗，香港酒店業嘅生意係十幾年以嚟最好。既然咁好，係咪應該再投資多啲？佢就話偏向買現成酒店多過買地返嚟興建，但依家香港嘅酒店價錢太貴，平均回報只有4至5厘，要好耐先回到本，所以暫時唔會喺香港買酒店。
上咗市唔係好耐嘅麗悅酒店就宣布，用2.02億元收購倫敦一幢物業用作發展酒店，呢幢物業距離希斯路機場只係半個鐘車程，有許可證可興建242個房間。
另一方面，邱達偉嘅哥哥邱達昌喺尋日嘅遠東酒店股東大會後，正式宣布退任唔做董事，話要專心搞好其他業務。
余絲韻