絲絲講場：渣打組織義工團幫長者攞六千蚊
政府派6,000蚊，本月底就開始登記，絲絲雖然好想快啲有得用呢筆錢，不過都要敬吓老，等公公婆婆攞咗先。絲絲收到風，渣打香港個人銀行業務營運總監黎馮佩齡（黎太）負責呢個「派錢」Project，佢哋班員工仲好有心，組織咗個義工團幫一班長者登記，而管理層都好支持呢個活動，黎太亦參加埋一份，一於一齊行善最樂。
據講今次招募義工好成功，第一日已經滿額，有成100人參加。義工團會喺第一個組別登記日期，即係八月二十八日至九月十日，到志願組織例如日間老人中心或老人院舍，幫一班長者填登記表。
員工有義工假期
不過，渣打班員工喺返工時間出咗去做義工，絲絲好擔心佢哋咁樣要扣人工喎？渣打公關姐姐話畀絲絲知，原來渣打每年都有3日義工假期，員工可以扣假去做義工，唔使擔心會少咗人工。絲絲覺得公司有義工假期，可以鼓勵多啲員工去做義工，令多啲有需要嘅人可以得到幫助，真係一舉兩得。
余絲韻