絲絲講場：最創新內企騰訊稱冠
《財富》雜誌中文版旗下網站財富中文網剛公布咗「2011年最具創新力的中國公司」排行榜，騰訊控股（00700）、百度及萬科企業排首3位，呢個結果唔算意外。
騰訊掌舵人馬化騰年紀輕輕已做出成績，公司成立只有12年，依家係藍籌股，即使近期股價跌咗咁多，市值仍超過3,300億元。馬化騰早前宣布開放騰訊最核心嘅資產──6.7億客戶群，目標係合作夥伴由依家嘅2萬家突破至10萬家，分成收入達200億元，相當於騰訊現階段一年嘅收入。睇嚟騰訊嘅宣言：「全方位平台開放，支持服務，成就夥伴」，係佢哋榮登呢個榜首位嘅關鍵元素。
市場化企業創新力強
通常具創新潛力嘅公司，都係屬於比較「活」嘅公司或行業，所以今年上榜嘅25家企業之中，有超過三分之一係不具有壟斷資源嘅市場化企業，呢個數字對比中國500強中，多數嚟自具有壟斷資源企業嘅局面，市場化企業喺創新力方面嘅能力就好突出。
從地域上劃分，北京喺企業創新方面仍發揮領軍作用，25家上榜企業中，總部位於北京嘅佔11家；廣東係第二大來源省份，有騰訊、萬科及網易等5家企業上榜；傳統農業公司四川新希望農業亦首次入榜，排第16位。
余絲韻