絲絲講場：數碼通IFC新舖 嶄新「流動」銷售
數碼通（00315）喺IFC商場嘅新舖重新開業，絲絲當然要去湊吓熱鬧，入到去覺得與一般嘅門市好唔同，睇真啲原來舖內冇晒平時一張張Set喺度，用嚟簽約、收錢嘅枱及電腦，店員就個個拎住iPhone及iPad篤篤吓，到底搞邊科？
採最新付款方案
絲絲即刻捉住數碼通CEO黎大鈞問吓，佢就話呢間新舖係全亞洲第一間採用由VeriFone及Global Payments提供最新付款方案嘅門市，喺iOS平台無線操作，為已加密嘅數據提供HSPA網絡傳輸，所以喺店內任何地方都可進行交易，可以為顧客帶嚟新嘅購物體驗以及用少啲紙，環保之餘亦提高效率，仲話希望遲啲可以喺全線門市採用。
絲絲覺得用咗呢項新技術，門市嘅感覺高科技咗好多，買嘢都開心啲！
余絲韻