本周港股立立亂，人人都話似「大時代」，絲絲聽到好多古仔，當中有兩個賺蝕故事峰迴路轉，都幾戲劇性，可以同大家分享吓。
第一個故事係有一個小經紀，喺本周三尾市有客落盤沽10張期指，點知佢手震震多個0，落咗100張沽盤，而且取消唔到，佢即時向上司匯報，被省到「立立靚」，仲成晚食驚風散等到天光，點知尋日股市裂口低開，佢即時平倉反而每張勁賺700點，90張賺成63,000點，幫公司賺咗超過300萬元。呢個經紀仔見有錢賺，仲厚面皮問上司有冇錢分，結果梗係又捱一頓臭罵啦！
另一個故事發生喺關於本周三中午嘅7股停牌事件，事主係專炒窩輪嘅專業大戶，一向直接致電發行商落柯打，嗰朝早佢睇好港交所（00388）下晝出業績，買咗「兩球」錢嘅港交所Call輪，佢睇到股市大反彈，開開心心食完飯之後，下晝兩點返到辦公室致電發行商沽晒食胡，點知「阿矇對阿矇」，發行商又「受咗」接晒貨，賺咗成個開。幾分鐘之後，發行商打番電話畀佢話原來停咗牌，柯打無效，事主好專業，一向落柯打都有錄音，佢嬲到要搵律師幫手講數，可見停牌事件真係累人不淺。
余絲韻