《紐約郵報》報道，索羅斯前女友兼巴西電視劇女星費雷喺前日入稟曼哈頓最高法院，控告曾經答應送間屋畀佢嘅索羅斯出爾反爾，索償5,000萬美元（約3.95億港元）。
現年80歲嘅索羅斯曾搭上現年28歲嘅費雷，兩人約會咗5年後喺去年分手。費雷嘅供詞話，索羅斯曾答應贈送位於曼哈頓一個價值190萬美元嘅單位畀佢，兩人分手後曾一度復合，就喺一個浪漫嘅晚上，索羅斯竟然話畀喺枕邊嘅佢知，嗰個單位已經送咗畀第二個女人。
咁仲未夠，費雷話兩人其後發生爭執，索羅斯竟然動粗，打咗佢幾巴及用手勒住佢條頸，仲將一盞玻璃燈掟向佢，雖然掟唔中，但費雷腳部受傷需要縫針。
費雷仲話索羅斯曾就此道歉，並提議改送另一個價值430萬美元嘅單位畀佢，但最終再次食言。
索羅斯嘅代表律師承認，索羅斯與費雷的確曾經斷斷續續咁交往，但表明今次指控顯然係有人企圖從一位富翁身上榨取金錢，又否認索羅斯曾動手打費雷。
余絲韻