絲絲講場：恒生梁永祥突請辭
恒生銀行（00011）尋日有一個頗令人感到突然嘅公布，就係執行董事兼個人銀行業務主管梁永祥（William）將會喺年底前離開恒生。William同絲絲講，佢話今次離開唔係退休，更加唔係健康理由，只係覺得喺恒生工作咗17年，有啲攰之餘，亦都想展開事業嘅新一階段，所以先至有呢個艱難嘅決定。佢笑言之後要努力搵工先得，仲叫絲絲幫手留意吓喎。
大家都知William係恒生嘅老臣子，自九四年加入恒生後，一直晉升至入董事會，一手一腳「湊大」恒生信用卡，更加係佢嘅得意之作。William話佢都好唔捨得一班同事，同事亦密密約佢食飯Farewell（餞別），佢講笑咁話希望唔會食到變肥仔。
替補執董空缺受關注
William將會喺下周六（二十日）辭任執行董事，之後就會開始放大假。除咗休息之外，佢已經計劃要抽多啲時間打高爾夫球，期望能躋身Golf高手行列咁話。絲絲記得William本身已經係歌唱高手，加埋打Golf可謂文武雙全。
消息話，恒生稍後會公布接替個人銀行業務主管嘅人選，不過大家最關心嘅，當然係會唔會有人加入董事會出任執行董事。有人就估計近年晉升快過火箭嘅總經理兼財資業務及投資服務主管馮孝忠好有機會，但亦有人估話唔定恒生中國行長薛關燕萍會由非執行董事轉任執董。
余絲韻