市場熱線：旭光調整近尾聲

本地魚缸跑輸外圍

呢排個市chok上chok落認真難玩，不過，呢四日魚缸唔係低開高收、就係高開低收，期指開波相反方向操作贏到笑。尋日恒指開波即跌超過500點，曾經兩次收窄到跌得幾十點，收市仍跌188點，睇落個市好似低位有支持，但睇番外圍市況，南韓倒升，滬綜指升1.27%，標普期指全日升超過20點，歐洲開市亦升2、3個%，港股仍係主要市場當中最差嗰個，加埋期指無厘頭大低水184點，沽空金額佔總成交13%，港股點解咁當黑？

講起黑，前日港交所（00388）將冧機歸咎於黑客，所謂禍不單行，港股果真跟隨外圍大幅低開，焗住「過夜」嘅股民欲哭無淚。

尋日傳阿爺會降低出年起保障房目標到800萬套，中國建築（03311）同水泥股即刻腳軟，古勝認為呢個消息可信性唔高，阿爺今年已先後被迫放慢核電同高鐵兩大重點發展項目，今次如果連保障房都要cut，阿爺顏面何存？

紅色飛機再度發威

古勝呢排力薦飛機股，喺高鐵減速、人仔升值同油價下跌3重利好下，尋日再度起飛。航運股原本嗌救命，但中海集運（02866）竟然公布第三季加運費，刺激航運股反彈，歐美經濟唔掂擺在眼前，但祖國每個月出口增長都令人跌眼鏡亦係事實，究竟孖屐係唔係過於悲觀呢？海陸空股剩得火車出軌，減速、停止審批仲要減埋價，但總算壞消息出得八八九九，如果再冇意外發生嘅話……

香港架火車就威得多，港鐵（00066）派成績表前勁升4.46%，但咪好似尋日中興（00763）業績前係威係勢，業績後就無以為繼。

呢排每日都有股民趁低撈貨，穩陣型股票最多人吼，高息更受歡迎，就算股市再跌都有得守。但炒鬼反而偏愛大跌股，雖然話接下墜中嘅刀子好考功夫，但古勝認為只要嚴守止蝕就有值博率，而有超賣feel嘅實力股就最啱。呢排10隻有9隻股都係超賣，有啲低處未算低，所以要揀疑似見底股。

可博回補下跌裂口

曾經係「中投三寶」大炒特炒嘅旭光（00067）可以成為一博對象，不經不覺隻股由4.5元高位一度跌穿兩蚊，但兩日穿咗兩蚊位都有反彈，可視之為初步見底，但再跌穿兩蚊就要考慮止蝕。旭光啱啱發咗盈喜，但其實原因係「中國高分子」今年入帳，所以發盈喜有啲多餘。而且咪以為盈利多咗會拉低PE，因為大量發新股進行收購嘅關係，每股盈利反而有所攤薄。

根據坊間統計預測，旭光攤薄後今年嘅預測PE唔夠6倍，舊年以每股3.15元發新股應付收購，發畀中投嘅CB換股價亦要2.81元，依家股價風險唔算高，博佢補番下跌裂口位2.55元，但再進一步可能會有難度，因為將會進入蟹貨區。

古勝