市場熱線：持盈保泰撈底咪心急

上周環球貨幣及股票基金錄得700億美元淨流出，係雷曼爆煲以來最大筆淨流出，反映市場避險情緒升溫，商品基金錄得29億美元淨流入，資金主要熱捧黃金，將金價推到每安士1,681美元的歷史新高，加埋標普降級消息配合，今日黃金揸家等住見1,700美元樓上。

古勝唔係咁悲觀，跌三幾百點係正常，但話跌穿二萬點未免誇張，話晒調低評級早有晒心理準備，十年期美債價格自兩黨火併以來價格不跌反升。孖屐反應一向好難估，調低希臘同葡萄牙評級可以觸發股市大跌，但日本被降級則乜事都冇。坊間預測美國國債同企業借貸成本會高幾十點子，但實際利率仍然好低。

港股被迫做「提款機」

講番美股，呢排chok過林峰，日日好似坐過山車咁，道指雖然回升60點，但更具代表性嘅標普指數仍要跌，納指更要跌近1%，最弊係ADR要跌116點，加埋花旗國降級，恒指最低消費要300至500點去找數。港股一向有「提款機」之美譽，歐美暫時冇得沽，惟有搞香港。

雖然話老美降級係預咗，但長遠影響好深遠，標普講明睇美國削赤進展，未來十二至十八個月可能再降一級。奧巴馬啱啱話希望增加政府開支去創造就業，窮鬼仲喺度扮闊佬，到時再降級就搵你愛。

美國降級有一個好處係消除咗一個不明朗因素，孖屐焦點會放喺意大利同西班牙，雖然兩個國家發誓會削減開支，但孖屐好似唔多信，淨係睇鬥牛國失業率超過兩成，班友夜夜笙歌，巴塞同皇馬冇錢都搏命買球星，所謂洗腳唔抹腳就係呢類。

QE3睇怕欲罷不能

明明香港無債一身輕兼庫房水浸，人哋債台高築，香港股民就要幫手埋單，真係唔知怨邊個？未來兩、三日又有大單嘢，祖國聽日會公布CPI，依家外圍風雨飄搖，就算通脹高都未必敢咁快加息或RRR，但亦唔會再放水救市。上次金融海嘯反而救咗內房股，今次亦可能係一個轉機，今個月會公布二三線城市限購令名單。

話時話，北京試點推出「限地價競房價」幾有新意思，即係地價事先限定，然後承諾（樓）價低者得，好過香港政府一方面要高價賣地、一方面要遏制樓價。

跟住就到美國聯儲局議息，睇怕QE3欲罷不能，明知冇乜作用亦要頂硬上，個個總統心態都一樣，經濟衰退唔好發生在自己身上，博到連任固然好，博唔到亦留畀下屆總統去收拾爛攤子。

電池股要諗計轉型

講番上周五嘅港股，「千點屠牛記」慘無人道，恒指最多暴瀉超過1,200點，3點過後見歐股唔係咁傷，恒指跌幅先少過千點，收報20,946點，但期指又低水超過200點，已預示有大鑊嘢跟尾。其他數字相當肉酸，成交係平時兩倍，得38隻股票上升，422隻股票創52周新低，講PE幾平都冇用，思捷（00330）卒之跌穿20蚊。

天能動力（00819）承認近手產能要停產，復牌先大跌，但收市只係跌2.7%，而停產廠房僅佔產能3.5%嘅理士（00842）反而大跌7%，超威（00951）則冇升跌。淨睇公司通告的確好多疑惑，其實鉛酸電池導致血污染遲早玩完，3隻電池股長遠計都要諗吓點樣轉型。

依家撈底要好有勇氣，回歸基本步可能要好似金融海嘯咁，諗啲冇咁受經濟環境影響嘅民生相關股，例如恒安（01044）、維達國際（03331）同食品股等。

古勝