絲絲講場：渣打醒神早餐慰勞夥計
渣打（02888）上半年盈利連續9年創新高，香港區業務重奪最賺錢地區嘅寶座，管理層亦非常識做，為咗答謝員工，尋日朝早請咗中環總行及國金嗰邊嘅同事食醒神早餐──星巴克嘅藍莓鬆餅及綠茶咖啡。
大家係咪覺得呢個早餐配搭好特別呢？「藍+綠」即係渣打品牌嘅顏色，慰勞員工都要配合集團形象。除咗一班員工有醒神品牌早餐，喺尋日朝早嘅記者會亦照顧周到，惠及一班為業績期已捱咗成個禮拜嘅傳媒。
聘兼職配合政府派錢
渣打唔單只禮待員工及傳媒，同時以客為先，渣打香港個人銀行業務主管禤惠儀（Mary）話，下半年會動用超過一億元強化全線分行網絡，希望未來能夠開多十間八間分行，不過佢就呻搵心水舖位好難，想喺靚位開分行唔係易事。
政府派6,000蚊會喺本月二十八日首輪登記，Mary話已有專責小組籌備，又要增加人手，依家正招聘兼職員工。渣打香港行政總裁洪丕正（Ben）就話，仲未諗點樣拎呢6,000蚊喎。
渣打香港以前公布業績後見傳媒，基本上都係由阿Ben一人主持大局，不過尋日就多咗兩位女將助陣，除咗Mary之外，另一位係香港區企業銀行及金融機構部董事總經理周李婥娟（Gloria）。
余絲韻