絲絲講場：歐達禮年薪較韋奕禮少14%

政府發言人話，歐達禮將收取600萬元嘅定額年薪，另外可享有與表現掛鈎，上限為200萬元嘅浮動薪金。喺訂定歐達禮嘅薪酬時，考慮因素包括工作要求、個人履歷、市場薪酬及金融監管機構主管嘅薪酬等。

最多只(逗)到800萬

睇番韋奕禮嘅年薪，固定薪金及津貼有720萬元，酌情薪酬有144萬元，再加上退休計劃供款，總計有933萬元。歐達禮嘅年薪就最多只有800萬元，似乎與現時嘅通脹環境唔太脗合喎？

不過有中環人同絲絲講，話韋奕禮喺證監會已做咗6年，故兩人年薪唔可以直接比較，況且其他主要金融監管機構例如金管局嘅總裁陳德霖，年薪與上任總裁任志剛相比亦都少咗。

咁又係嘅，喺金融海嘯後，全球對金融機構高層嘅人工都非常注視，更何況係監管機構。歐達禮今次由估計賺開數以百萬美元計，回巢到證監會只𢭃800萬元年薪，肯定唔係為錢，「金魚缸」人士都希望佢會有一番作為！

余詩韻