絲絲講場：十里銀灘3日傳賣50億 楊國強督師有頭威
標榜「給你一個五星級的家」嘅碧桂園（02007），佢哋今年嘅大型新盤十里銀灘剛啱喺上周六開盤，第一期就推咗成5,000幾個單位。話晒都咁大個盤，仲要喺依家咁嘅政策環境下推出，梗係要隆重其事啦，絲絲就聽老友講，甚少「蒲頭」嘅碧桂園董事長楊國強喺開盤當日親自到銷售中心現場視察，佢哋喺全國多個區域嘅總經理亦有到場坐鎮，唔怪得有消息話，喺十里銀灘開盤後短短3日，就賣咗成50億人仔！
打快攻避開限購令
呢個十里銀灘位於惠州東部，有去過嗰度嘅人同絲絲講，喺香港坐車要成兩粒鐘先去到，果然真係啱晒度假，聽講吸引到唔少香港及內地買家，有人致電售樓處詢問，對方話依家公寓及別墅已全部售罄，只剩下部分向海嘅洋房仲有貨。無他嘅，話晒令發展商頭痕嘅限購令唔知幾時殺到，碧桂園以七五折減價之類嘅優惠做招徠，銷情咪好囉！
余詩韻