滙恒喺本周一公布咗業績，一眾股民對成績表都幾滿意，絲絲尋日去咗恒生（00011）嘅記者會，聽到恒生銀行副董事長梁高美懿提起滙控（00005）前主席浦偉士會喺十一月嚟香港。講起浦爵士，相信上一輩嘅「獅子銀行」擁躉對佢一定唔會陌生。
浦爵士喺一九四五年加入當時嘅香港上海滙豐銀行，八六年接替沈弼出任主席，佢最巴閉係九一年成為滙控首任主席，雖然滙控之後喺九三年遷往倫敦，但當年浦偉士依然經常往來香港及內地，直至九八年退休先至定居倫敦。數吓手指，浦爵士退咗休都十幾年，相隔幾代管理班子，但佢嘅風采仍然迷倒唔少喺「獅子銀行」出身嘅賓卡。
其實浦偉士間唔中都會嚟香港，與舊時嘅工作夥伴見面敍舊。好似喺去年十一月嘅時候，佢都喺香港，仲特登去咗馬場睇跑馬，咁又係，話晒佢曾經喺香港賽馬會身居要職，更加係最後一位香港滙豐大班出任馬會主席添，相信佢對香港馬圈應該有深厚感情。
講起浦偉士，大家都會諗起佢嘅愛將，佢就係剛榮休嘅滙豐中國前董事長兼滙控前執董，現留任滙控顧問嘅鄭海泉（Vincent），Vincent喺今年先卸下職務，相信佢依家有充足時間與呢位舊上司敍吓舊啦！
余詩韻