市場熱線：金蝶隨時開快車

老美解咗燃眉之急，但孖屐開始雞蛋裏挑骨頭，最緊要睇評級機構會唔會咬番主人，評級機構又插紅旗、又狂咬歐豬唔放，佢哋自命公正，如果放過美國，實畀人話大細超。加上個製造業指數好差，甚至有人估緊老美好快就出QE3，真係害人不淺，普京仲鬧美國係世界經濟嘅寄生蟲。弊在祖國本身亦問題多多，恒指雖然睇落幾硬淨，但問股票行班散戶就知道七月係沉淪而非翻身。

凱雷似睇好海爾

大笨象半年盈利多過孖屐預期8個巴仙，但股價升得1.23%的確嫌少，論估值係幾吸引，只係驚住老美一旦被降低評級，錢莊揸住嘅債券要跟住貶值。上升股份又係熟口熟面，藉住前日公布嘅本地零售數據，金飾鐘錶股又創新高，華晨（01114）同濠賭股等亦係常客。奇葩股實在唔多。

海爾電器（01169）有凱雷買入CB同窩輪，但已冇咗名牌效應，復牌仍跌2%。凱雷啱啱高沽太保（02601）賺到盆滿缽滿，但話得說回頭，家電下鄉就快到期，會否延期對家電股股價好有影響，凱雷揀呢個時候入飛，唔通睇好仲有得下鄉？

暴跌股多到數唔晒，海陸空股全部都唔掂，航運股衰足年幾，火車股撞到四輪朝天，古勝呢兩個禮拜推介嘅飛機股亦冇油，但三類股點都係飛機股好啲，等派埋中期成績表可以酌量吸納。

金蝶國際（00268）算係呢排較硬淨嘅股，而公司則會喺兩個禮拜後派半年成績表，過去五年，盈利增長最慢係金融海嘯後嘅○九年得17%，其餘平均增長都有三成，今年上半年環境唔差，所以成績表亦值得睇好。祖國軟件服務業嘅「十二五」規劃據聞會喺下個月出台，到時可能有得短炒，國家預計軟件服務業每年增長速度超過兩成，其實金蝶一向增長都快過行業平均水平。

續處高增長階段

富士康（02038）話用機械人取代人手即刻連升兩日，機械人未必間間公司都用得着，但好多公司會用軟件去節省支出，所以金蝶一直處於高增長階段，亦因此強勢得有道理，隻股預測PE成28倍，同QQ（00700）有得比，一間為企業服務、一間為人民服務，但金蝶市值只係QQ嘅3%；QQ已經壟斷市場，但金蝶仍有好大增長空間，而公司亦有大把現金進行收購，剛啱旗下金蝶醫療以1.2億人民幣買咗一間廣州科技公司大部分股權。

如果金蝶業績對辦嘅話，股價重返5.3元嘅52周高位機會猶在，呢隻可以放長少少，跌穿4蚊至考慮止蝕。

戰報

德永佳集團（00321）+14%

古晨於前周二推介德永佳集團，昨日最高見過11.12元，創52周新高，較當日低位累升超過14%。

英皇鐘錶珠寶（00887）+17%

帥哥於七月二十五日一力推薦英皇鐘錶珠寶，股價昨日創上市後新高，話咁快賺足17%。

古勝