金融海嘯過後，西方國家為咗拯救經濟而瘋狂咁印銀紙，令到世界立立亂，有好多專家都企出嚟發表意見，銀行公會署理主席盧重興就好老實咁話睇唔通下半年形勢，但佢就預告一定會好精彩。
盧重興喺尋日銀行公會例會後，被問到點睇下半年市場形勢，佢好風趣咁話睇唔通，又話在座嘅都係財記，相信大家下半年一定會有好多好精彩嘅發展。如果屬實，財記應該將佢呢句當係「祝福」抑或「詛咒」呢？
絲絲見到盧重興時，佢經常妙語連珠，尋日有記者問佢金管局對銀行增加儲備要求，銀行界有乜嘢意見，佢直接答話「銀行公會唔管呢啲」。
銀公例會尋日開咗超過一粒鐘，記者再冇問盧重興，點解主持會議咁耐傾咗啲乜，因為對佢喺三年前同一個問題嘅答案記憶猶新，佢當年答案係「因為我講嘢慢」。
余絲韻