絲絲講場：阿里雅虎軟銀傾掂數
支付寶嘅轉讓風波，令阿里集團馬雲、雅虎楊致遠及軟銀孫正義呢3位生意上嘅好拍檔，差啲搞到友情破裂，但經過兩個幾月嘅溝通，馬雲尋日作出咗頗大嘅讓步，就係由佢全資揸旗嘅支付寶，將繼續為阿里集團及相關公司提供電子支付服務，而阿里集團喺支付寶上市前後都會得到合理回報，換句話講，亦保證咗阿里集團大股東雅虎及軟銀嘅持續收益。
支付寶創三贏局面
絲絲睇番協議文件，支付寶與阿里集團及其相關公司嘅合作關係仍然有效，而馬雲攞咗支付寶，亦會畀番阿里集團合理嘅回報，當中包括上市前每年支付寶及其子公司嘅49.9%利潤撥歸阿里集團，而且上市時會畀阿里集團一次性現金回報，回報額係支付寶上市時總市值嘅37.5%（以IPO價為準），相信回報額將不少於20億美元及不多於60億美元。
馬雲話，過去幾個月與軟銀及雅虎一齊進行咗坦誠及積極嘅溝通，達成一個兼顧各方利益嘅協議，相信協議對阿里集團嘅所有員工、客戶及股東們都有利；雅虎及軟銀都話呢個協議係一個理想結果。其實計絲絲話，少啲爭拗，多啲合作及創新，網民就係最大嘅得益者啦。
余絲韻