一諗起日本，美食多到數唔晒，我最愛梗係吉列黑豚豬扒同日本拉麵。近期一講起拉麵，味千拉麵又成為大家焦點，內地傳媒踢爆，話佢哋嘅豬骨湯原來唔係長時間熬製，而係「超濃味精」湯。消息一出，味千（00538）股價好似碗湯咁，一瀉如下。你哋都知啦，一聽到碗湯好似唔係新鮮去整，自然聯想到食物質素問題。大家都知，食品質素係近年內地食品公司禁忌，亦都係股民大忌，一有乜風吹草動，投資者肯定好似食咗過敏藥，先沽為妙！
如果大家有留意，味千竟然將問題放喺投資者上，話佢哋唔睇清楚，真係離晒大譜！最抵鬧係佢哋連鈣質比例都誇大，又話有成1,600毫克，計計吓先得嗰50毫克。寫又寫得唔清唔楚，講又講到一舊舊，真抵打！
從純投資角度，一有不利好消息就肯定先走為妙（過分沽售都係咁話！）不過，若然佢哋嘅招牌豬骨湯，唔係有任何危害身體嘅化學元素所組成，咁樣大家一齊回歸基本。諗諗吓，原來碗湯，成本咁低，毛利率自然又可以提升，加上內需當中衣食住行都係非常重要，如果佢能夠盡快解除投資者嘅疑慮，喺大方向之下乘風破浪，又可以重新上路，咁就好！
香港大學電子金融服務榮譽助理教授 徐燦傑