絲絲講場：大新陳偉思3種食品妙喻私貸
每家銀行都會花盡心思搞宣傳，但成效係點就好睇創意及誠意。大新銀行喺尋日就宣布推出清卡數嘅私貸計劃，該行產品及市務部主管陳偉思（Vivian）就用3種食品比喻新計劃嘅特點，仲話已經準備好宣傳攻勢。
究竟食品與私貸有乜嘢關係？Vivian話，低脂低油嘅沙津會令人聯想到低息；心形蛋糕就代表員工服務用心，例如佢哋聽到有客戶話希望有高貸款額，所以計劃嘅最高貸款額達120萬元，市場上好少有咁高；最後就係清涼潤喉飲品，令客戶可以大聲講出所需，配合佢哋「一開聲就幫」嘅口號。
邀名導陳果拍廣告
Vivian話除咗會喺報紙賣廣告，佢哋仲請咗攞過金像獎及金馬獎嘅名導演陳果拍廣告，期望畀大家耳目一新嘅感覺。老實講，依家市面上嘅私貸計劃真係花多眼亂，鬥息低之餘，透過宣傳攻勢打造深入民心嘅形象，不失為一個爭取客戶嘅好辦法。
余絲韻