智能手機及雲計算已被公認係IT產業嘅未來所在，正當開發iPhone嘅蘋果公司與Android嘅Google鬥個你死我活之際，我哋祖國嘅馬雲就異軍突起，阿里巴巴（01688）母公司阿里集團旗下嘅阿里雲計算喺尋日發布「阿里雲OS」（簡稱雲OS）移動操作平台，以及首款與內地廠家合作為聯通（00762）網絡生產嘅智能手機W700，大有與兩大巨人較勁之勢。
據統領呢個項目嘅阿里雲總裁王堅透露，「雲OS」係研發團隊經過3年努力開發，同時兼容Android應用程式，更重要嘅係「雲OS」已經整合包括電郵、搜尋及導航等雲計算服務，而且介面勁似一般智能手機。
尋日亮相嘅W700由於使用WCDMA網絡，加上已印有聯通「沃3G」Logo，會先喺月底於聯通登場，傳聞售價2,680元，夠晒競爭力。
至於一直覬覦iPhone商機嘅中移（00941），喺尋日亦針對自攜iPhone上台推出補貼優惠，除咗現金回贈之外，中移更為有關客戶會提供專屬嘅設定指南，教用家點樣靈活結合移動及WiFi網絡，提升上網表現，擺明車馬要從聯通手上搶奪更多iPhone客！
余絲韻