市場熱線：華創貴得有道理

不過，恒指雖好，國指仍跌70點，下跌股數更係上升股數嘅兩倍，散戶仍係捱打。上升股當中，以中小型內房股較好，包括恒力（00169）、中渝（01224）同北辰（00588）等。志高（00449）話有德銀增持，股價回升9.26%，但翻查紀錄，德銀五月以每股0.899元增持2.6億股，本月初以每股0.699元掟2.6億股，今次又以每股0.549元增持2.6億股，轉手得又快又多，令人懷疑係咪德銀借貨畀人沽空；依家咁多黑池交易，港交所（00388）仲建議經紀牌隱形，散戶捕風捉影好易被老點。

鐵路股暫不宜撈底

古勝早幾日提醒大家小心航運股會發盈警，尋日中海集運（02866）開齋，其他航運股亦再度沉淪，連帶「貓貓狗狗」（01199）同勝獅（00716）呢類集裝箱股都要跌，原本計劃下個月上市嘅集裝箱出租商中海綠舟有啲牙煙。理文手袋（01488）前日升完18%，尋日跌返18%，兩日計埋仍要蝕本。ASM太平洋（00522）業績合格，但確認定單減少，亦要下跌6%。

「兩鐵」（00390及01186）呢排仲慘過航運股，照計起鐵路只係業務一部分，冇理由仲慘過南車母子。南車（01766）就猛話撞車唔關佢哋事，但溫情總理講到追究到底，鐵路股仲未可以撈底住，尋日輪到做火車鋁合金車架嘅麥達斯（01021）大跌7%。

「哎幫」（04208）估唔到咁益街坊，認購44萬元以下全中，暗盤價仲升6.5%，認購44萬執兩萬八，債券升5%已經好多，何況呢隻係零風險投資，相信好多人包括古勝在內都大嘆走寶。而高鑫（06808）尋日平收，隨時整固之後再抽上，但在下仍係嗰句：43.5倍PE喎！今日加多句：點解唔買華創（00291）？

超市數目勝在夠多

華創喺上個月守得住30蚊之後，呢個零月係咁升，尋日一度升到35元，同52周高位只係差五毫子，呢兩日升勢無疑要多謝高鑫。高鑫個「大潤發」勝在夠大，但華創嘅華潤萬家超市勝在夠多，喺祖國已經有3,300間零售店。

講到影子股，大家亦應該留意到青啤（00168）曾升穿50蚊創新高，華創旗下嘅雪花啤係銷量「一哥」；青啤創新高，雪花啤嘅估值亦一樣提升，所以正確講法係華創受高鑫同青啤「雙提攜」。當然，華創本身估值都一啲唔低，預測PE亦超過30倍，不過呢排啲內需消費股咁吃香，華創跟同類股比都係高處未算高，而且30蚊附近已打咗個「鋼底」，長線投資仍然制得過。

戰報

中國東方文化（02371）+10%

詩詩昨日叫人留意中國東方文化，股價於低位0.55元起步，最高升至0.61元，即日穩袋十個巴仙。

台泥國際（01136） +20%

股博士於七月二十日分析台泥國際，相較推介時低位4.43元，昨日高位見過5.39元，賺足兩成。

古勝