絲絲講場：高鑫演繹《大時代》

當絲絲與一位內地大律師行嘅靚仔律師傾偈時，剛好就嚟9點半，聯交所上市台前好多人好似倒數咁開始叫囂，成班公司董事及幾位保薦人企喺報價屏幕前面等開市，一手揸香檳，一手揸拳頭，叫住「升、升、升」，高鑫開市第一口價就報9蚊，較招股高出兩成半。當時絲絲覺得場面似曾相識：「好像喺度拍戲」，點知靚仔律師居然答：「好似《大時代》。」原來秋官、劉青雲呢套經典電視劇喺內地都咁深入民心。

三地都有大戶捧場

絲絲尋日仲識咗好多「賓卡」，有幾位係嚟自台灣法巴及花旗嘅高層，佢哋都參與咗今次高鑫招股，仲話台灣嗰邊都有好多機構投資者買貨，唔怪得高鑫首日掛牌表現咁勁，事關兩岸三地都有人捧場。

仲有一樣嘢令絲絲感到意外，就係高鑫送畀港交所嘅上市紀念品，居然係一幅印有高鑫大賣場嘅海報，上市都不忘「抽水」，乘機「Hard sell」一下。

余絲韻