台灣喺早幾日公布咗歷來第一份「百大品牌」名單，港人識得嘅大部分都有上榜，包括ＨＴＣ、宏碁、華航、長榮、鼎泰豐及新東陽等。由於早前寶島爆發嚴重嘅塑化劑風暴，所以統一及康師傅今次就冇咗影，不過就連鴻海都冇上榜，難免有遺珠之憾嘞。
呢次評選係由四百九十八家企業中揀出「百大」，最犀利係電子資訊產業公司，佔咗四分之一，可見台灣電子業嘅優勢。除咗最出名嘅「雙A」──宏碁（Acer）與華碩（ASUS）外，上榜嘅仲有BenQ、奇美、台積電、趨勢科技及ＨＴＣ等。
其他品牌有好多都廣為人識，好似麗嬰房、金門酒廠、新東陽及鼎泰豐咁，而喺大陸紅到發紫嘅「85度C」、世界名牌自行車捷安特亦梗有上榜喇。但由於早前爆發塑化劑風暴，只要喺「塑化榜」上現過身嘅，今次都冇份入選百大品牌。所以話，統一及康師傅依然係「名牌」，但與「百大」就冇緣喇。
台灣老字號嘅義美食品由於標榜天然，所以係貴價貨，而佢哋自設嘅國家級研究室仲令到公司安然度過塑化劑風暴，正當全台民眾發現義美原來係「寶」，但竟然冇參與選拔，你話幾可惜呢！就連鴻海、台塑都冇上榜，所以覺得份名單仲係差少少囉！
余絲韻