絲絲眼見美債違約危機畀市場炒到慶合合，諗住打電話畀北控（00392）副主席張虹海傾吓，張總話佢都好想同我傾，但實在好唔得閒，事關佢現正身處非洲，與聯合國嘅人員一齊考察環保項目。絲絲心諗，唔通北控要投資非洲？
張總話，其實北控旗下都有環保業務，但詳情喺長途電話就講唔到咁多，遲啲再詳細傾喎。絲絲諗深一層，北控以燃氣業務為主，冇乜環保相關業務，但旗下北控水務（00371）就唔同嘞，佢哋嘅看家本領係污水處理，而喺非洲呢類常年處於乾旱嘅國家，的確好需要污水處理裝置，今次張總與聯合國人員一齊去考察，梗係會拍住一齊做，令當地嘅水源可以更有效利用，多啲人有水用。同時身兼北控水務主席嘅張總，睇嚟今次去非洲可能係謀劃北控水務下一步「走出去」，將業務延伸去非洲嘅可行性。
余絲韻