友邦保險（01299）喺聽日公布業績，前行政總裁麥智信（Mark Wilson）日前向外地傳媒話，當年佢真係有向AIG董事會講明，若友邦賣畀保誠（02378）落實，佢就即刻走人。
點解麥智信要大力反對賣盤呢？佢話友邦及保誠有自己嘅文化，更加係業務上嘅競爭對手，情形就好似要將兩支英超宿敵球隊曼聯及曼城合併，對員工有好大傷害。雖然交易最後告吹，但由於同聲同氣嘅AIG前主席戈盧布下台，加上AIG行政總裁本穆沙又想「變革」，因此麥智信亦要跟住戈盧布請辭。
不過話說回來，友邦又搵嚟另一個阿Mark──杜嘉祺（Mark Tucker）執掌大權，大家都知杜嘉祺係保誠前行政總裁，唔通佢哋真係唔怕文化衝突？
事隔一年，麥智信話佢冇怪過本穆沙，認為對方喺AIG嘅工作做得好好，只係大家嘅意見唔同，所以佢覺得離開友邦係合適決定，並冇覺得後悔。不過有口痕友就話，其實本穆沙已經唔再信任麥智信，而麥智信亦對離開感到相當無奈。
咁未來麥智信有乜打算？佢話唔少公司都想重新審視喺亞洲區嘅業務，佢都留意緊一啲機會，話唔定將來會為呢啲想發展亞洲及新興市場嘅公司効力喎。
余絲韻