市場熱線：中建材抵買之選

今日期指結算，但下月初先係生死大戰。米蘭站（01150）、「趴打」（01913）同「喼神」（01910）呢幾隻奢侈品股又再炒過，除咗炒祖國計劃減奢侈品入口稅嘅消息之外，其實奢侈品已經率先加價，聽講勞力士加得最勁，所以東表（00398）同英錶（00887）愈升愈有亦有其道理。

消費股要升到你信

好多消費股創晒新高，除咗以上幾隻之外，仲有金飾股、濠賭股、華晨（01114）、汽車代理股，都係同同胞荷包腫脹大有關係，稍為例外嘅係兩隻鉛酸電池股：天能（00819）同理士（00842）亦再創新高，原因主要係怕污染，執咗細廠益咗大廠。

高鑫升四成跌晒眼鏡，今年預測PE達43.5倍，你話貴唔貴？但「趴打」同「喼神」招股PE夠話貴啦，咪一樣升到你唔信？總之升到你信為止，就算依家唔買，到股價回落一、兩成你就會覺得抵買，同啲奸商先嘜高個價再減價嘅道理一樣，其中一個例子係國藥（01099），上市炒到幾十倍PE，呢年幾以來累積咗唔少「趁低吸納」嘅長線投資者，但「地心吸力」呢樣嘢好難抵抗。

電能（00006）尋日揭開藍籌股派成績表序幕，股價亦再創新高，今日到長建（01038），批完股之後已重返高位，隨時呢兩日可以順手創埋新高，但古勝今日會較有興趣睇吓中綠（00904）份成績表，呢隻已被列為高危民企股，但三月發生日本地震或有利公司食品出口。

古勝短線會繼續留意績優股，水泥股近日喺高位有整固，皆因公布六月水泥價格比五月稍為回落，工信部早排公布淘汰落後產能企業名單，當中涉及782間水泥企業，淘汰總產能1.53億噸，超出之前1.33億噸預期，水泥股未有咁快玩完。

大行目標愈調愈高

中國建材（03323）有大行一面倒唱好，目標價愈調愈高，最新出爐係中銀國際，預測公司下月派嘅中期成績表賺多2.2倍至34億人仔，目標價調高到20.7元，相當於今年預測PE係11.2倍，即係現價PE得9倍。中銀嘅目標價已經唔算高啦，大和睇25.2元、瑞信睇23.3元、大摩睇20元，就算打個8折都好和味。

記唔記得中建材喺金融海嘯之後曾經跌到得1蚊呢？而且係1送1紅股之前，即係當年買入已經升值超過30倍。當時大家對孭債高嘅公司驚隨時會執笠，依家此一時彼一時，但其實祖國加咗幾次息之後，對呢類高負債嘅公司好唔着數，不過公司趁住股價飛升，諗住發A股集資150億人仔，其中一半用來還債，揀依家發A股真係大好時機；而另一半集資額用來收購提高產能，呢次發A股屬於利好消息，所以喺水泥股當中可列為首選。

古勝