上星期，道指以科技股交到好業績帶動港股飛升，一個傾唔掂數，又為港股帶來陰雲。都係嗰句，炒股唔炒市，唔使諗咁多。科技開支提升，永遠都有一個預測性指標，因為資訊科技開支，永遠係為企業迎接下一個升浪，好多行家同我講，大小銀行已經為佢哋嘅資訊及基建系統做好工夫以迎接下一個大時代，一齊留意吓啦！
大摩早期已經為金蝶國際（00268）提升咗評級，目標價睇5.3港元（相當於預期市盈率27倍），金蝶是內地領先嘅中小企業資源管理系統（ERP）開發商，過去透過積極擴大銷售團隊的成效終於喺一一年度浮現出來，估計其一○至一二年度銷售增長將加碼至到26%。加上一一年中期收入較去年同期將強勁增長49%，到7.95億元人民幣，淨利潤將增長125%。根據中國工業和信息化部（MIIT），今年前五個月全國嘅軟件銷售較去年同期增長28.2%，加速趨勢明顯。
MIIT的數據更表明內陸城市推動全國的軟件銷售增長。而且金蝶嘅收入主要來自中低端用戶並且大舉向內陸城市以滲透銷售網絡式出擊，因此金蝶從中受益較大，對金蝶股價飛舞充滿期待。繼續追蹤，永無放鬆！
香港大學電子金融服務榮譽助理教授 徐燦傑