銀行服務愈嚟愈貼心，設計出嚟嘅服務簡直照顧埋客戶下一代，仲好有針對性添，絲絲聽聞花旗集團及渣打私人銀行都搞咗個少年精英計劃畀客戶嘅仔女，不過入場門檻係為人父母嘅客戶最少要擁有一間企業，又或者佢哋夠料成為私人銀行客戶，與內地富二代培訓計劃有得揮。
暑假就快到，絲絲好多朋友都會幫仔女搞吓遊學團、報名讀暑期班，又或者一家人去旅行避吓暑，渣打私人銀行就幫客戶諗埋，畀佢哋嘅下一代可以喺銀行實習，教識佢哋制訂商業策略及分析。
至於花旗商業銀行就更加務實，針對中小企繼承人提供「青少年精英領袖訓練計劃」，呢個計劃由花旗與理大合辦，據花旗集團嘅高層話，希望參加者可透過訓練計劃了解父母經營嘅挑戰，日後接手生意都知道有乜嘢責任。
絲絲聽講，以上呢兩個計劃都有資深「賓卡」帶領，具吸引力之餘，應該對銀行增加客源會好有幫助。
余絲韻