每年書展盛事，絲絲都希望睇到多啲有意義嘅活動及好書推介，今年新地（00016）就連續第4年搞「新地齊讀好書」計劃，由副主席兼董事總經理郭炳聯（Raymond）坐鎮，佢仲話有本書令佢諗起先父郭德勝添。
原來Raymond最近睇咗兩本好書，其中一本係《曾文正公家書》，即係晚清重臣曾國藩嘅家書，入面提到做人嘅大道理─勤力、節儉、謙虛，Raymond話與佢先父嘅教導一樣。另一本好書係《箴言精選六十則》，書中提到「每事問」、「忌死頂」、「業精於勤荒於嬉」，令Raymond覺得除咗可以勉勵學生，連新地員工都啱用，所以好醒目咁大量買入派畀員工。
今次活動，新地贊助咗200位基層兒童去參觀書展，與呢班9至14歲嘅小朋友分享閱讀興趣，每人並獲240蚊現金津貼買書。
有小朋友問咗一條絲絲都覺得好奇嘅問題：「Raymond日理萬機，邊有時間讀書？」呢位大老闆就話事在人為，最緊要識分配時間，例如瞓唔着或放假嘅時候就睇多啲書，最重要係可以「修身」兼成為公司員工嘅好榜樣喎；另外，Raymond亦與時並進，開始用iPad讀電子書添。
余絲韻