市場熱線：西王糖現價估值吸引

老美提高債務上限踏入倒數一個禮拜，禮拜晚通宵開會未有進展，道指期貨喺亞洲時段跌過百點，雖然話美股期指信唔過，但點都構成心理性影響；大部分人都相信結果會好似荷里活電影，喺最後一刻個主角會拆除炸彈happy ending結局，但未知剪紅線定綠線前會相當煎熬。

鐵路相關股鬥衰

古勝啱啱話飛機股買得過，點知就發生撞火車事件，買股嘅嘢可謂時也命也。不過，自從前任鐵路部長違紀落台之後，鐵路股一早已經腳軟，尋日跌得最慘嘅係中國自動化（00569），公司有一半業務係做鐵路安全及緊急控制系統，雖然溫州單嘢唔關佢事，但今次係「誅九族」，中自化及南車兩母子（01766及03898）首當其衝，跟住係中智交通（01900）同兩鐵（00390及01186），連廣深鐵（00525）都要跌近6%。

風電設備股亦係大輸家，中傳動（00658）盈警大跌15.5%，金風（02208）都跌6.5%，兩隻嘅往績PE分別係4.6同5倍，簡直係大平賣。味千（00538）亦跌逾8%，內地傳媒踢爆佢嘅豬骨湯係開粉，間公司咁貴PE好難博反彈。

尋日逆市奇葩除咗飛機股之外，電動自行車電池股包括超威（00951）同理士（00842）都勁升，但天能（00819）創新高後倒跌。創新高嘅股大多熟口熟面，例如金飾鐘錶股、濠賭股、華晨（01114）同「趴打」（01913），古勝上禮拜五話中國食品（00506）可以創新高亦冇老點。

依家支撐魚缸嘅最利好因素莫過於成績表，美國企業業績大部分有料到，而香港業績期就由呢個禮拜五嘅友邦（01299）開始，友邦同和黃（00013）都有人炒定先，但油股呢排好弱，中石油（00857）尋日跌近3%，三大油股做國家代表收購資產其實即係搵小股東笨。

毛利率逐步回升

尋日A股跌近3%衰過港股多多聲，但幾隻內地糖股都逆市上升，皆因食糖價格高企，本地隻西王糖業（02088）亦升4.3%，隻股主要睇兩樣嘢：玉米價同糖價，上個禮拜公布第二季毛利率為14.8%，雖然比第一季再跌0.3個百分點，不過比舊年同期則升咗0.9個百分點，而玉米成本按年增加13.8%，但兩種主要產品：結晶葡萄糖同葡萄糖酸鈉嘅售價則分別按年上升23.8%同16.9%，以七月嘅走勢嚟睇，第三季可能會更加好。

西王糖上月尾宣布向阿媽買咗幾條澱粉同麥芽糊精生產線，而且係以溢價發股畀錢，阿媽持股量增至69%，大股東揸重貨係信心表現。隻股往績PE為8.63倍，睇上半年毛利率有回落，下月派嘅中期成績表未必有驚喜，但現價估值低仍有可博空間。

戰報

超威動力（00951）+21%

古晨於七月十五日吼中超威動力，隻股果真有威力，昨日逆市升逾8%，較推介時低位升超過21%。

環球實業（01026）+22%

帥哥上周三睇好環球實業科技，當日最低見過0.5元後便如入無人之境，昨日勁升一成一，足足升夠兩成二。

古勝