孖妹缸湖遊：投資書變贏

黃：Enrich Professional Publishing董事總經理黃元山

搵名家探討中國經濟

祺祺：你喺大學教書，又做專欄作家、上市公司顧問、慈善團體委員等職位，你依家仲搞埋出版事業，果然係「百變星君」！

　黃：以前讀書及工作時，成日要睇好多金融及經濟嘅書，但發現當中有好多都係「吹水書」，專業性及實用性有限，所以我投資出版業，一來為興趣，二來係希望出版具有專業學術性嘅英文參考書籍，令有需要嘅讀者可以真係睇到言之有物嘅相關用書。依家美國經濟唔掂，歐洲又有債券危機，中國就成為環球投資熱點，但目前研究中國金融經濟現象嘅專業書籍非常少，所以我哋呢條線嘅出版主題係「聚焦新中國」。

高妹：有道理！咁多對沖基金進駐香港搵食，想必都係吼住中國！

　黃：投資要成功，就一定要投資自己熟悉嘅嘢，而探討中國金融及經濟狀況亦一樣，所以我哋會搵中國知名學者及經濟專家去寫書，以中國人嘅視野分析內地金融經濟議題，好似著名經濟學家成思危亦係我哋嘅作者之一。現時中國經濟增長佔全球七成，近期市場擔心中國經濟會「硬着陸」，投資者要拆解呢啲問題，前提要對中國整體經濟結構及未來發展有了解，如果大家想知多啲，就要睇我哋嘅書喇！

祺祺：不如又講吓你嘅投資心得啦！

　黃：我嘅投資心得就係唔好心存僥倖。好似出版英文書咁，中英對照翻譯十分講求技巧，校對時點樣小心都有可能會出錯，所以要出版一本高質素嘅書，真係要花好多心血。投資亦都一樣，你唔睇多啲、研究多啲，出錯機會自然高。

閱讀好書增值添勝算

高妹：但我好少喺書店見到你哋出版嘅書喎，其實搞出版有冇錢賺先？

　黃：搞出版有一定程度嘅文化使命，賺錢呢條數亦唔難計算，不過我認為唔可以用金錢回報去衡量成績囉。因為金融書比較專業及具學術性，目標客戶多以企業家、學者、研究生、大學書店及世界各地嘅圖書館為主，每本書售價約100美元。現時我哋維持每月出版3至4本書，喺歐美及東南亞國家都有分銷商，營銷策略係發展全球銷售平台，並非只做香港或內地生意，之前我上網發現，連美國哈佛大學圖書館都有我哋嘅書！

祺祺：近期港股嘅表現麻麻，你睇好乜嘢投資產品？

　黃：之前內地CPI高見6.4%，我認為呢個「食品大牛市」會持續，但中國經濟「硬着陸」嘅機會好微，加上中央調控內房、內銀嘅政策會繼續，令揀股難度增加，如果投資者冇把握，我覺得買大市好過買股票！我喺○八年開始買黃金，未來亦睇好金價走勢，不過唔建議大家喺現水平高追。總之理財唔等於橫財，投資唔可以單講運氣，一定要有知識基礎，做足功課。

近年金融、經濟、投資、理財及創業等類型書籍多不勝數，孖妹經常見到散戶拎住當天書咁讀，唔通真係「書中自有黃金屋」？高妹搵咗業內人士傾吓！

尹：商務印書館（香港）零售總監兼企業傳訊總監尹惠玲

銷書與股市興衰掛鈎

高妹： 我想知道喺過去10年，財金類書籍嘅銷售市道係咪好勁？

　尹： ○三年因為有沙士，經濟環境唔好，當年財金類書籍嘅新書量及銷售量都係過去10年最差。再睇番○七年至去年商務中文書（非文學類）暢銷榜資料，○七年港股做好，恒指衝上高位31,900點，當年首20本暢銷書中，就有12本係財金類書籍，但之後銷量卻每況愈下，○八年有金融海嘯，只有5本財金書打入二十大，○九年及去年更分別只有4本及1本，可見讀者對財金書嘅熱衷程度下降咗唔少。

高妹： 嘩！我仲以為好賣得添？

　尹： 有啲財金專家嘅書喺○六至○七年賣得好好，但近年就可以用「唔理想」去形容銷量。以大中華地區計算，現時每年平均都有1,000本財金類書籍出版，但整體銷量就跌緊！不過由○三年開始，財金類書籍嘅售價亦有增幅，7年前每本約賣70蚊，依家就要賣90幾蚊喇，增幅都有20%！

讀者口味趨向多元化

高妹： 咁以前係咪炒股天書最好賣呢？

　尹： 都係關於股市及技術分析為主，但近年我發現讀者口味有所改變，唔再局限金融投資類型，以去年及今年為例，有關宏觀經濟、地產置業、女性投資理財、親子理財嘅書都多咗，而且銷量亦唔錯。近年本港出現高樓價、「蝸居」、「80後」等議題，出版商都會趁機出版有關書籍，好似《80後置業錦囊》、《上車置業攻略》都已經打入今年上半年嘅暢銷書榜。

高妹： 原來中文嘅財金類書籍愈賣愈差，可見出版行業真係唔易做，咁黃元山真係要加油喇！

30.5%散戶追買黃金

市場擔心歐債危機不斷蔓延，黃金作為資金避難所嘅角色進一步抬頭，令金價上周一度升破1,600美元見歷史高位，但所謂「高處不勝寒」，現時你會追買黃金嗎？據今期《東方產經》網上民調截至上周末晚上6時嘅結果顯示，30.5%散戶話會追買黃金，其餘69.5%人就話唔會追買。

（高妹）（祺祺）

若有料報畀高妹同祺祺或有嘢問，可電郵money.biz@opg.com.hk