市場熱線：海隆有勢展升浪

恒指修補番上次嘅下跌裂口，但又出現條22,100點嘅上升裂口，古勝仍維持上落市預測，升跌都唔好咁擒擒青，到升穿250日線（22,840點）先考慮酌量加注。上周五乜股都升，連最差嘅航運股亦卒之反彈！但升幾個巴仙唔夠買膠布，亦要小心會發盈警。

出口股終威番次

歐債危機紓緩，最開心係出口股，利豐（00494）同思捷（00330）齊升超過5%霸住藍籌升幅榜頭兩位，思捷有大行掉轉頭唱好，由低位反彈一成多。掘金股人跌佢升、人升佢跌，因為話避險意識降低；但賣金股就繼續好掂，六福（00590）衝破40蚊；賣錶仲勁，英皇鐘錶（00887）同東方表行（00398）齊升超過7%同創新高。金舖一早多過米舖（後者幾乎絕迹），但沿住條彌敦道行個圈就發覺好誇張。古勝都係嗰句：有貨就揸住，冇貨就咪搞。

其他逆市下跌嘅股份要自己檢討吓跌因，例如四川成渝（00107）跌穿52周新低，的確唔明點解咁差。撈底係高難度動作，但散戶血肉長城買建行（00939）總算有甜頭，公路股有減價危機，但阿爺會延長經營年期補數，加埋PE低、息率高，計落唔係咁差。

古勝呢排較心水嘅係飛機股，月中時已推介過南航（01055），升幅有目共睹。另外，兩隻飛機股則有待突破，國航（00753）處於三角形走勢，東航（00670）亦有破三頂迹象。講到PE，三隻飛機股都係單位數字，原本驚住高鐵會搶走生意，所以估值低啲都係合理，依家發覺高鐵原來冇乜料到，而飛機服務喺高鐵威脅之下亦有改善，估值回升係好應該。

半新股呢排翻生，上周五輪到「田雞王子」（01259）升逾一成，但仲未跳出水面，較冷門嘅海隆（01623）亦升6%收報2.44元。在下成日話買新股或半新股最緊要係貨源歸邊，業務冇人識唔係問題，急升之後大把人爭住識，東岳（00189）同聯塑（02128）都係最佳例子。

業務可享高估值

海隆做鑽油設備唔算太冷門，香港亦有幾間公司做油田服務，呢類股最主要睇油價，因為油價高就自然吸引油公司採油，但全世界開採有利可圖嘅油田已開得八八九九，主要係設備舊換新。不過，祖國開始積極發展煤層氣同頁岩氣就帶來商機，海隆今個月已同中石油（00857）簽咗供應鑽桿協議。

海隆雖然係大陸公司，總部設喺上海，但高端鑽桿產品主要喺阿布扎比嘅合營公司生產，喺阿聯酋、俄羅斯同加拿大亦設有辦事處，業務幾國際化，所以估值應該高啲，依家嘅預測PE只係8倍左右。歐債問題暫時解決，油價有機會重上100蚊美金，買海隆係油股之外嘅另類選擇。

戰報

中集安瑞科（03899）+15%

古晨上周四介紹中集安瑞科，公司其後公布盈喜消息刺激股價升完再升，兩日加埋升近15%。

六福集團（00590）+13%

帥哥前周三推介六福，當日低見37.35元後便逐步攀升，上周更再創歷史新高，累積升逾13%。

古勝