絲絲講場：渾水反遭渾水摸魚？
渾水研究（Muddy Waters）早前令到市場談虎色變，搞到好多中資公司都驚畀佢點中，但絲絲尋日睇到外電，佢哋居然畀人渾水摸魚玩番轉頭，喺「老虎頭上釘蝨乸」嘅，居然話係香港人喎。
狀告遭冒名勒索
事緣渾水研究及其創辦人Carson Block本月二十日喺美國洛杉磯入稟，指控一個香港人冒認係渾水嘅僱員，恐嚇一家唔開名嘅企業進行勒索，渾水話一旦確定被告人身份，就會修改起訴狀。渾水又同時告埋一家新聞網站，指佢哋六月二十一日發出嘅一篇新聞稿係惡意誹謗渾水嘅名聲。
不過證交會發言人其後向外電澄清呢份新聞稿係假嘅，但就冇評論有否調查相關網站。咁嚴重嘅指控，梗係要告啦。
渾水上半年接連揭發6間喺北美上市嘅中資企業，存在會計上疑點，令對沖基金有機可乘瘋狂沽空，搞到呢批公司股價暴跌，市值唔見一大截，最出名嘅係搞到嘉漢林業及其本港附屬綠森（00094）雞毛鴨血；喺六月底，市場傳渾水將發布關於雨潤（01068）嘅報告後，雨潤股價曾暴跌一成。
余絲韻