堪稱集團紀念日
話說光行母公司光大集團喺八三年八月十八日成立，9年之後，光行就喺九二年嘅同一日出世；喺○九年嘅同一日，光大證券成立；然後喺去年嘅同一日，光行喺A股掛牌，連股票編號都改埋做601818。依家光行H股都想喺八月十八日上市，如果光行董事長唐雙寧睇到H股首日股價，能夠好似A股首日掛牌咁大升18%贈興，就更加飲得杯落喇。
不過絲絲未聽到有人話光行H股會用邊個上市編號，皆因佢哋對8號及18號都咁重視，唐總要喺剩番為數唔多嘅冧巴中揀，都幾傷腦筋，因為1818及818已經畀招金及高陽科技用咗。睇嚟下一個對於唐總嘅「數字考驗」，唔係盈利及業績，而係上市編號。
余絲韻