近排大家一諗起民企，即刻諗起紅旗，全因「穆迪紅旗」報告。報告一出街，股價急瀉，單日市值計，無咗400億元，都咪話唔犀利，直情好似災難片一樣，人踏人，屍橫遍野，真陰功！大家可能唔知，證監喺今年六月開始，就「提供信貸評級服務」進行監管。無牌，基本上係唔可以從事以上服務。可惜，信貸評級之後，又整個紅旗報告。報告內容並不透明，令到大家一時之間都唔知信邊份好。投資者唔知底蘊，梗係先沽離場，一個唔好彩，由紅旗轉綠旗，股價飛升，咁樣投資者就真係無仇報，係咪！
我自己就覺得，評級無疑係一件好事，起碼投資者可以從當中對公司嘅財務能力有一定程度上理解，但買唔買呢間公司，我似乎又覺得應該留畀其他專業團體去分析，似乎對中立公司所講嘅中立就更加難能可貴。
好似穆迪話禹州地產（01628）更換會計師有問題，實情係人哋間公司一直都係用緊安永，根據證監規則，穆迪已經係失實陳述，咁樣一份報告，投資者解讀錯咗都好大鑊！
無疑，證監規管係好事，因為起碼各市場參與者唔想因為出位而令自己揹鑊。發牌只係一種手法，金融市場應該標榜專業，各自喺自己崗位做好，深化自己嘅行內知識，同其他參與者共同合作，咁樣香港金融市場先至可以講得上係有希望，係咪？
香港大學電子金融服務榮譽助理教授 徐燦傑