美聯（01200）喺○八年遭神秘投資者梁向榮狙擊嘅事件，絲絲記憶猶新，危機過後，美聯創辦人兼主席黃建業就喺去年五月，大手減持美聯至略高於5%。貶吓眼又一年，美聯宣布授出近766萬份購股權，行使價每股4.29元，咁係咪有乜啟示呢？
喺去年五月底，絲絲仲講緊黃建業好唔容易先重奪大股東地位，曾動用逾億元增持美聯至13%，之後突然又以每股7.85元大手減持美聯至5.01%，僅符合須予披露股權變動規定，套現咗3.66億元。其後絲絲一直有留意美聯走勢，睇吓黃主席眼光係咪咁準，睇淡樓市？結果係黃主席沽早咗五個幾月，美聯股價喺去年十一月八日高見8.63元後先至到頂。
美聯股價之後輾轉回落，到尋日只有4.29元，公司就喺尋日授出約765.91萬股認購權，當中有720.916萬股配畀黃主席，市值3,093萬元，絲絲同佢計一計，如果佢全部行使，佔美聯擴大後股權就會升番上6%。絲絲今次又要留意吓，黃主席幾時會行使？不過行使期都幾長o架，介乎今年八月一日至二○一九年底。
余絲韻