鞋業巨匠百麗（01880）與百度聯手入股內地網站優購網，搞鞋類購物網已早有所聞，但投資金額原來唔只20億人仔，內地不斷有報道指投資規模可能達30億人仔，雖然唔多清楚兩位金主嘅注資比例，估計要到下月先有結果，但百麗今次肯冒咁大風險，皆因有熟人護航。
聽好友講，優購網嘅幕後揸Fit人原來係百麗「嫡系」人物，即係百麗國際集團前副總裁張學軍，佢依家出任網站最高領導人嘅CEO一職，但只係今年四月嘅事，睇嚟百麗嘅投資大計早有預謀。百麗其實早喺○八年已成立過官方購物網站淘秀網，不過淘秀網嘅銷售額佔集團比例唔多，因此本月初先透過優購網進軍B2C嘅鞋類網購市場。
百麗搵嚟百度合資出擊，陪住壯膽之餘，實際操作時又少一份擔心，呢次可能係百麗電子商貿翻身之作，分分鐘可追趕由騰訊（00700）注資支持嘅鞋品網絡商城好樂買。
余絲韻