絲絲講場：港燈幫漁民應用太陽能
講到慳電，唔單只局限地面上嘅活動，原來海上嘅都得。絲絲尋日跟電能（00006）旗下嘅港燈公司出海，睇吓佢哋點樣幫啲漁船及魚排，喺船上安裝太陽能板發電供船上電器使用，以取代部分柴油發電，減少污染。據港燈工程及發展董事尹志田話，今次係本港漁業界首次大規模喺漁船上應用太陽能。
安裝太陽能板發電
佢話今次總共撥款約一百萬元，資助約五百艘漁船及魚排，喺船上安裝太陽能板發電。參與計劃嘅漁船包括小船、二十五米以上嘅大船及收魚船等，每艘船隻會安裝一套發電容量為六十瓦嘅太陽能光伏板，目前首批一百多艘漁船已裝妥並開始試用。
五百套太陽能板每年可以生產超過三萬度「零排放」嘅環保電力，為船上嘅照明燈、風扇、充電器等設施供電。若要產生同等電力，預計漁民需使用九千多公升柴油發電，二氧化碳排放量為二十多公噸。
港燈喺南丫發電廠嘅太陽能發電系統本月運行滿一年，共產電超過七十三萬度，較原設計指標高出一成八，減少咗約六百一十公噸二氧化碳排放。港燈正着手將系統由五百五十千瓦擴展至一兆瓦，預計明年初完成，屆時每年預計可產電超過一百一十萬度。
余絲韻