市場熱線：中食隨時有驚喜

滙豐中國七月PMI預覽跌到得48.9，兩年幾來第一次跌穿50，但全球魚缸對呢個數字好似冇乜反應，而A股跌約1%。恒指呢幾日都牛皮，但上升股數得434隻、下跌則有661隻，創52周新高嘅得11隻，包括4隻濠賭股；創新低就有53隻，包括兩隻航運股同1隻碼頭股。

祖移好耐未威過

中海油（00883）同祖國移動（00941）上半年一隻強、一隻弱，依家風水輪流轉，尋日港股仍係靠晒祖國移動，隻股好耐都未咁威過，花旗話祖國移動最快出年可以賣「哎瘋」，依家逢「哎」都「瘋」，連「哎幫」都超額認購，所以偉仕（00856）同瑞聲（02018）兩隻「哎哎概念股」仍然保持升勢，而兩隻本地電話股數碼通（00315）同和記香港（00215）亦炒高。

公路股被祖國傳媒批鬥咗好耐，依家輪到外資批鬥，花旗尋日唱淡公路股，以四川成渝（00107）插8%最慘，而滬杭甬（00576）則創52周新低，淨得深高速（00548）因車流量數字理想而跌得較少。依家外資逐個板塊唱衰，兼且成日擺鳥龍，高佬同興達（01899）計錯數連句「鎖你」都冇，前日又有大摩朝早連發5份金錢龜（00011）報告，上個禮拜阿伯公然「彈簧QE3」，好人都畀佢哋玩謝。

祖國通脹未回落，但部分價格開始鬆綁，食用油限價已經喺上月尾結束，有消息話部分零售價已升咗兩成，亦有消息話「金龍魚」同「福臨門」已申請加價5%，但跟住公司又否認。不過，呢排食品股蠢蠢欲動係好明顯，統一（00220）、康師傅（00322）、中糧（00606）同中國食品（00506）都跑贏大市。

拓高檔紅酒市場

中食股價的確幾強，同52周高位亦只係差唔夠5%，公司其中一項業務係分銷小包裝「福臨門」，食用油加價對公司有利，但中食兩項主要業務係葡萄酒同可樂飲品，飲品加價比較容易，就算阿爺唔畀加，亦可以縮細容量變相加價，所以統一同康師傅咁強勁可以理解。

至於葡萄酒比較棘手，就算畀你加價亦未必敢加，因為競爭相當激烈，雖然祖國同胞飲紅酒嘅人數增長迅速，但外國紅酒亦以強勢湧入內地，並透過唔同渠道杜絕假酒，祖國移動就搞咗個紅酒電子商貿平台仲大受歡迎。

中食嘅「長城」品牌係老字眼，管理層話長城會打造成高檔酒，寧願賣少啲但靠高毛利補番數，而集團三月時亦推出另一品牌「天賦」，同係走高檔路線，希望三年內高檔紅酒佔營業額一半。

呢排內需股跑贏大市，其中一個因素係九月減稅，當中月入4,000至1萬人仔嘅中產最受惠，每個月可慳番幾百蚊去消費，值得飲多兩杯，管理層亦話過今年會好賺過舊年，下月派成績表隨時有驚喜，古勝就買佢呢個零月可創新高。

戰報

北方礦業（00433）+30%

古晨上周四貼中北方礦業，當日低位0.29元，買盤跟住狂掃，昨日升至最高見0.375元，差唔多執到三成。

古勝