究竟滙豐與中電（00002）有乜關係？答案就係兩間公司都好重視新能源發展。依家全世界都講環保，絲絲收到風，滙豐環球研究專登請咗岳啟堯（Joseph Jacobelli）做潔淨能源業務環球聯席主管兼公用事業業務亞太區主管。
聽聞Joseph大有來頭，佢之前喺中電做新能源項目發展嘅集團總監，負責管理碳排放抵免額、低碳投資等工作，係有成20年經驗嘅環保猛人。滙豐環球研究話，Joseph今次會坐鎮香港，向環球研究證券研究亞太區主席莊敬華（Chris Georges）匯報，佢同時會做埋公用業務嘅研究發展，仲會聯同駐倫敦嘅聯席主管Robert Clover一齊負責研究。
Chris話依家世界愈嚟愈重視氣候變化所帶嚟嘅影響，希望Joseph可以帶領潔淨能源業務發展。絲絲嘅解讀就係，呢門生意大有可為。
余絲韻