絲絲講場：長實強勢落戶上海
內地經濟發展迅速，各行各業都爭相北望神州捕捉商機，長實（00001）亦唔例外，近年積極以長實品牌開拓內地房地產市場，尋日就喺上海正式公布集團「落戶上海」大計，宣布旗下喺當地三大項目命名及定位。
今次搞得好隆重，唔單只集團執行董事趙國雄、長實地產投資董事郭子威齊赴上海主持命名儀式，就連好少喺公開場合出現嘅長實執董鍾慎強亦有到場，可知佢哋幾咁重視落戶上海。
三大項目進度理想
趙國雄尋日向絲絲細心講解各個項目嘅命名及細節，其中普陀真如項目命名為高‧尚領域，係長實喺上海首個大型綜合項目，總建築面積逾110萬方米，設有320米高商廈，堪稱滬西第一高樓。長實喺當地嘅首個甲級寫字樓項目就位於陸家嘴核心區，項目命名為東方滙經OFC，建築面積逾10萬方米。
至於早前曾透露有機會喺年內登場嘅嘉定項目，係長實首個進駐上海嘅大型綜合性花園住宅項目，已命名為湖畔天下，總建築面積60萬方米。趙國雄話，呢批項目自動工以來進度令人滿意，好快會展開市場推廣攻勢。
余絲韻