絲絲講場：卓百德度過「禁鬚期」
股票「禁售期」大家就聽得多，「禁鬚期」你聽過未？且由大摩前董事總經理、現任Portwood Capital主席卓百德（Peter Churchouse）作真人示範。
卓百德喺香港工作31年，曾成功預測九八年金融風暴出現，佢見過咁多報、上過咁多電視節目，就算唔認得佢個樣，都會記得佢係留鬚嘅。不過唔知大家有冇留意，早幾年佢剃咗佢嘅招牌「二撇雞」，好多人都唔知佢點解要咁做，亦唔係好慣佢冇鬚個樣。
籌款承諾3年唔留鬚
市場有傳聞話，佢係因為同人輸賭樓市走勢，輸咗之後就要手起刀落同鬍鬚講拜拜。不過絲絲有個姊妹最近就親自問過卓百德本人，佢話係為咗做善事。話說卓百德係香港遊艇會嘅活躍會員，喺該會嘅一次慈善籌款Show內，需要為菲律賓某機構籌錢興建一個廚房，卓百德就挺身而出，唔係表演食炭，而係出賣自己嘅招牌鬚，卒之有人肯出15,000元買佢撇鬚，但條件係3年內唔准再留鬚。
卓百德當然為善不甘後人，之後3年都以青靚白淨嘅樣示人。不過唔知點解，絲絲覺得佢冇鬚個樣好似比較輕佻，好彩依家「禁鬚期」已過，佢又可以成熟穩重嘅Look見人嘞。
余絲韻